Oddný Anna Björnsdóttir

 

Oddný er fædd í Reykjavík og ólst þar upp. Hún lærði að meta náttúru Íslands í ferðalögum fjölskyldunnar í æsku og þegar hún stundaði staðarnám á Bifröst árin 1995-1998, þaðan sem hún útskrifaðist með B.S. gráðu í viðskiptafræði.

Hún kom víða við á námsárum sínum, en frá 1998-2008 starfaði hún hjá Össuri hf., þar sem þau hjónin kynntust.

Fyrri fimm árin starfaði hún frá Íslandi sem vörustjóri (Global Product Manager) og deildarstjóri vörustjórnunar- og tæknisviðs (Director of Global Product & Technical Management).

Frá 2003-2008 starfaði hún hjá Össur Americas í Kaliforníu sem framkvæmdastjóri markaðs- og almannatengsla (Vice President of Marketing and Public Relations) og síðar sem framkvæmdastjóri viðskiptaþróunar (Vice President of Business Development) fyrir Norður Ameríku.

Árið 2008 ákvað hún að skipta um starfsvettvang og hóf meistarnám í alþjóðaviðskiptum frá Bifröst, í fjarnámi frá Kaliforníu. Samhliða því sjálfmenntaði hún sig í lífrænum og sjálfbærum ræktunaraðferðum, heilbrigðu mataræði og lífsstíl, neytenda-, dýra- og umhverfisvernd.

Í lok árs 2010 flutti fjölskyldan heim frá Kaliforníu, en þar höfðu þau hjónin eignast tvo syni. Sá þriðji fæddist á Íslandi.

Frá hausti 2010-2016 starfaði hún sem ráðgjafi, stjórnarformaður og framkvæmdastjóri fyrirtækja í lífræna og heilsugeiranum í eigu Auðar Capital, síðar Virðingar, nú Kviku; lengst af, eða frá desember 2011 sem framkvæmdastjóri heildsölunnar Yggdrasill sem sérhæfði sig í innflutningi, markaðssetningu og dreifingu á lífrænum og heilsuvörum.

Samhliða því var hún ötull talsmaður lífræns og heilbrigðs lífsstíls, neytenda-, dýra- og umhverfisverndar. Hún var hvatamaður að stofnun Samtaka lífrænna neytenda og sat í starfshópum Neytendasamtakanna á sviði matvæla og landbúnaðar frá 2011-2017. Hún hefur setið í stjórn Vottunarstofunnar Tún frá 2014, Landbúnaðarklasans frá 2018 og stjórn Hampfélagsins frá 2019.

Frá 2014 hefur hún séð um sölu- og markaðsmálin hjá Geislum, en vörur fyrirtækisins eru seldar í 40-50 verslunum um land allt, breytilegt eftir árstíma.

Frá því að Yggdrasill var selt á vordögum 2016 hefur hún starfað sem sjálfstæður ráðgjafi á sviði matvæla og landbúnaðar. Sem slíkur hefur hún sinnt ráðgjöf og unnið fjölda verkefna fyrir fyrirtæki, stofnanir og samtök eins og Krónuna, Íslandsstofu, Matarauð Íslands, Icelandic Lamb, MjólkursamsölunaBændasamtökin og Atvinnuvega- og nýsköpunarráðuneytið sem formaður samráðshóps um betri merkingar matvæla, skipuð af sjávarútvegs- og landbúnaðarráðherra.

Hún hefur jafnframt skrifað fjölda greina í Bændablaðið og haldið erindi víða um land.

Vorið 2018 keyptu þau hjónin lögbýlið Gautavík í Berufirði í Djúpavogshreppi. Þau fluttu þangað með börnin og fyrirtækið það sumar og sinna þar sínum störfum.

Samhliða því stunda þau blandaðan smábúskap; halda sauðfé og hænur, stunda matjurtaræktun og  tilraunaræktun á iðnaðarhampi og úrvinnslu vara úr honum. Í það tilraunaverkefni hafa þau fengið tvo styrki; frá Atvinnuvega- og nýsköpunarráðuneytinu (jan 2020) og Uppbyggingasjóði Austurlands (feb 2020).

Í desember 2019 tók hún til starfa sem framkvæmdastjóri Samtaka smáframleiðenda matvæla samhliða öðrum verkefnum.

 

Geislar hönnunarhús ehf.

Gautavík, Berufirði
766 Djúpavogi
Sími: 777 6190 (Pálmi)
Sími: 869 7411 (Oddný)

This email address is being protected from spambots. You need JavaScript enabled to view it.

Kt. 680212-1630
Reikn.nr. 0111-26-290212